Hapones, 3 pa tiklo sa illegal recruitment
MANILA, Philippines — Bumagsak sa mga elemento ng pulisya ang apat katao kabilang ang isang Hapones na inireklamo ng illegal recruitment sa isinagawang entrapment operation sa Kalaw Avenue, Ermi-ta, Manila, ayon sa opisyal kahapon.
Kinilala ni PNP-Criminal Investigation and Detection Group (PNP-CIDG) Chief P/Director Roel Obusan ang nasakoteng Hapones na si Sato Kenichi, 63.
Arestado rin sa operas-yon ang mga kasabwat nitong sina Cynthia Banares, 45, Admin Registrar; Carlo Bana-res, 31, Japanese Language Instructor, at Jesse James Escalderon, 32 anyos .
Bandang alas-2:30 ng hapon kamakailan, ayon kay Obusan nang masakote ang mga suspect sa loob ng Japcom Training Center na matatagpuan sa Gochangco Building, Kalaw Avenue sa Ermita.
Sinabi ni Obusan na ang mga suspect ay inaresto base sa reklamo ng 35 kataong na-recruit ng mga ito para magtrabaho sa Japan kung saan siningil ng malaking halaga ng placement fee na bayad umano sa training at processing fee ng kanilang mga dokumento.
Gayunman sa isinagawang imbestigasyon ng PNP-CIDG ay nadiskubreng walang sertipikasyon o job order mula sa Philippine Overseas and Employment Administration (POEA) at Department of Labor and Employment (DOLE) ang recruitment agency ng nasabing Hapones at mga kasabwat nitong suspect.
“Upon knowing that the said training center is operating illegally, an entrapment operation was planned”, anang opisyal na nagresulta sa pagkakadakip sa mga suspect.
Kabilang naman sa kanilang mga naging biktima ay si Peter Laman na sa kabila ng nakabayad na ng placement fee at processing fee ay hinihingan pa ng karagdagang P26,000 na ang nasabing pera ay tinanggap ni Cynthia Banares pero sa kabila nito ay nabigong makaalis ng bansa.
Nahaharap ngayon sa kasong paglabag sa Presidential Decree (PD) 442 at Large Scale recruitment ang mga nasakoteng suspect na ini-inquest na ang kaso sa Manila Prosecutors Office.
- Latest