Pagbebenta ng mga ilegal na paputok, pinatututukan na sa Maynila
MANILA, Philippines — Sinimulan na ng pamahalaang lokal ng Maynila ang pagmonitor sa 17 palengke ng lungsod laban sa mga nagbebenta ng iligal na paputok.
Nabatid na iniutos na ni Mayor Joseph Estrada sa Market Administration Office (MAO) na maagang bantayan ang mga palengke upang hindi makalusot ang mga nais magbenta ng iligal na paputok.
“This early, we should start a close surveillance of our markets and strictly remind the vendors that they could be penalized for selling prohibited firecrackers as mandated by the law,” ani Estrada.
Alinsunod aniya, ito sa Republic Act 7183 (An Act Regulating the Sale, Manufacture, Distribution and Use of Firecrackers and other Pyrotechnic Devices.
Aniya, ang sinumang mahuhuling nagbebenta ay maaaring pagmultahin ng mula P20,000 hanggang P30,000 at ikulong ng mula anim na buwan hanggang isang taon
Tinukoy din ni Estrada ang Executive Order No. 28 na nilagdaan ni Pangulong Duterte nitong Hunyo 20 na naglilimita sa paggamit ng mga paputok sa mga community fireworks displays lamang.
Ayon kay Estrada, hinihintay pa rin ng lokal na pamahalaan ang Philippine National Police (PNP) na maglabas ng bagong listahan ng mga pinagbabawal na paputok at pailaw base sa EO 28.
“While we are waiting for the guidance of the PNP, we will continue monitoring our public markets following the provisions of RA 7183,” ani Estrada.
Base sa EO 28, ang PNP ang naatasang maglabas ng mga criteria sa mga pinag-babawal na paputok at pailaw sa loob ng 30 araw matapos magkabisa ang naturang executive order.
- Latest