Diplomat biktima ng ‘Basag Kotse’ gang
MANILA, Philippines — Nabiktima ang isang diplomat ng ‘Basag Kotse’ gang sa isang exclusive subdivision sa Makati City, kamakalawa.
Kinilala ang biktimang si Lishing Yang, 43, ng China, at nakatira sa The Sapphire Residences, Bonifacio Global City (BGC), Taguig City at sa Pasay Road, Dasmariñas Village, Makati City.
Lumalabas sa report na natanggap ng Southern Police District (SPD), naganap ang insidente alas-6:00 ng gabi malapit sa isang restaurant, na matatagpuan sa Gamboa St., Brgy. San Lorenzo Village, Makati City.
Ipinarada ng driver ng biktima ang sasakyan nitong kulay itim na BMW 5X, model 2016 na may diplomatic plate number 4642 dahil kakain sila sa naturang restaurant kasama ang pamilya at ilang kasamahan nito sa kanilang opisina.
Makalipas ang ilang oras, pagbalik nila ng sasakyan ay napansin nilang basag ang salamin nito at nadiskubre nilang nawawala ang nasa loob nitong school bagpack na naglalaman ng ilang mga libro, school identification card mula sa International School, Manila at eye glass na nagkakahalaga ng P7,000.00.
Nabatid, na walang CCTV camera sa lugar ng pinangyarihan ng insidente habang nagsasagawa pa ng follow-up investigation ang pulisya dito.
- Latest