Nangarnap, pumatay sa Grab driver, tugis
MANILA, Philippines — Nasa tatlo hanggang apat na “person-of-interest” ang tinutugis ngayon ng Pasay City Police na may kinalaman sa pagpatay sa isang Grab driver na kinarnap din ang sasakyan noong Huwebes ng gabi sa Pasay City.
Kahapon lamang kinilala ng Pasay City Police ang biktimang si Gerardo Maquidato Jr.
Ayon sa hepe ng Pasay City Police na si Senior Supt. Dionisio Bartolome, nasa tatlo hanggang apat na katao na ang kinilala sa ngayon ng kanilang mga imbestigador na huli aniya nakatransaksiyon ni Maquidato bago ito pinatay noong Oktubre 26, alas-7:45 ng gabi sa harapan ng Express Payment Center sa Bonanza St., Brgy. 189, Zone 20 ng nabanggit na lungsod.
Hindi muna ibinunyag ng Pasay City Police ang mga pangalan ng mga ito para hindi aniya maapektuhan ang kanilang imbestigasyon.
Ipinaliwanag ni, Bartolome, na nag-iingat sila sa kanilang isinasagawang im-bestigasyon sa insidente.
“It is complicated because for example, I booked for a ride at Grab but another person will ride instead. It can happen,” ani Bartolome.
Ayon pa sa naturang hepe, kinilala lamang ang naturang mga person-of-interest matapos ibigay sa kanila ng Grab management ang buong detalye ng biyahe ng biktima ng araw na iyun bago ito pinatay.
Kinilala ang biktima ng kanyang asawang si Brenda, 41 habang nakalagak ang bangkay nito sa Rizal Funeral Homes.
Sa affidavit ng misis ng biktima, alas-10:00 ng umaga noong Oktubre 26 umalis ang kanyang mister ng kanilang bahay sa Quezon City patungong trabaho gamit ang isang kulay silver Toyota Inno-va na may plakang-XV 7109.
Subalit, makalipas ang ilang oras ay hindi na aniya niya makontak ang cellphone ng kanyang mister, dahilan upang magtungo ito sa tanggapan ng Grab noong Biyernes, Oktubre 27.
Dito na aniya napag-alaman na huling drop off route ng kanyang mister ay sa Doña Neneng St., Pasay City na may 5.7 km mula sa Bonanza St., kung saan natagpuan ang bangkay nito.
Nabatid, na nasa P100,000 ang pabuyang ibibigay ng Grab management sa sinumang makapagtuturo sa mga taong responsable sa pagpatay kay Maquidato at sa pangangarnap sa dala nitong sasakyan.
- Latest