8-anyos kritikal sa ligaw na bala
MANILA, Philippines — Kritikal ang buhay ng isang 8-anyos na batang babae makaraang tamaan ng ligaw na bala buhat sa baril ng isang security guard ng isang pabahay sa Caloocan City , kahapon ng umaga.
Isinugod sa Dr. Jose Ro-driguez Memorial Hospital ang biktimang si Mecaila Magallion, naninirahan sa National Housing Authority (NHA) Pabahay sa may Sta. Rita, Brgy. 188 Tala habang kusang sumuko naman sa mga awtoridad ang security guard na si Florentino Singayan, nakatalaga sa naturang lugar.
Sa inisyal na ulat, dakong alas-7 ng umaga nang maganap ang insidente. Nililibot ni Singayan ang gusali nang kanyang ikasa ang dalang shotgun sa ikalawang palapag sa pag-aakalang wala na itong bala.
Nagulat na lamang umano siya nang biglang pumutok ang baril at nadaplisan ng bala ang ulo ng biktima na naglalaro sa tapat ng gusali. Agad na tinungo ng suspek ang kinaroroonan ng paslit at humingi ng saklolo para madala sa pagamutan.
Kusang nagtungo naman sa istasyon ng pulisya para sumuko si Singayan na nahaharap ngayon sa kasong frustrated homicide.
- Latest