Ginang binoga sa mukha

MANILA, Philippines -  Patay ang isang 44-anyos na ginang makaraang barilin sa mukha ng hindi pa naki­ki­lalang salarin sa loob ng ga­rahe ng mga trak sa Tondo, Maynila kamakalawa ng gabi.

Nakilala ang nasawi na si Marilou Villamor, pansamantalang nanunuluyan sa loob ng parking area ng Alliance of Concerned Truck Owners and Organizations (ACTOO) sa Parola Compound, Tondo, sa naturang lungsod. 

 Sa inisyal na ulat ni PO3 Michael Maraggun, ng Manila Police District (MPD)-Crimes Against Persons Investigation Section (CAPIS), dakong alas-11:10 ng gabi nang matagpuan ng helper na si Joseph Hanola, 29, ang bangkay ng biktima sa tapat ng guard post, sa loob ng parking area ng Confederation of Truckers Association of the Philippines (CTAP) sa Parola Compound sa Tondo.

Sa salaysay ni Hanola sa pulisya, nakarinig siya ng putok ng baril, kaya’t hinanap niya ang pinagmulan nito. Nagulantang na lang umano siya nang makitang duguang tumatakbo ang biktima hanggang sa tuluyang bumagsak at bawian ng buhay. Patuloy na inaalam ng mga pulis ang pagkakakilanlan at motibo ng suspek sa pagpaslang kay Villamor.