Salvage victim ibinalot sa garbage bag
MANILA, Philippines - Isang bangkay ng pinaniniwalang ‘tulak’ ng iligal na droga na isinilid sa garbage bag ang itinapon sa kalye, sa Caloocan City, kahapon ng madaling araw
Inilarawan ang hindi pa kilalang biktima sa edad na 25 hanggang 30, nasa 5’5 ang taas, nakasuot ng blue na pang-itaas at pulang short pants. Napupuluputan ng packaging tape ang katawan nito.
Nabatid sa isinumiteng ulat kay Senior Supt. Chito Bersaluna, hepe ng Caloocan Police, dakong ala-1:00 ng madaling araw nang madiskubre ng isang Ryan Francisco ang nasabing garbage bag na nakitang tao ang nasa loob, sa Quirino Highway, sakop ng Brgy. 179. Caloocan.
Naniniwala naman ang rumespondeng mga tauhan ng Police Community Precinct 4 na sa ibang lugar pinatay ang biktima at iniwan na lang ito sa lugar para iligaw ang imbestigasyon.
Sa pagsisiyasat ng Chief Insp. Liza Elnar Rillo, Scene of the Crime Operatives (SOCO) ng Northern Police District (NPD) nakuha sa side pocket ng shortpants ng bangkay ang tatlong plastic sachet ng shabu.
- Latest
