Dating tauhan ng BJMP, nadawit sa droga, itinumba
MANILA, Philippines - Patay ang isang babaeng retiradong miyembro ng Bureau of Jail Management and Penology (BJMP) na umano’y naging ‘tulak’ na ng droga nang pagbabarilin ng hindi pa nakikilalang salarin na iniulat kahapon sa Taguig City.
Namatay noon din si Imelda Pagaduan, alias Mel, 48, nakatira sa Santo Niño St., Purok 6, Brgy. Lower Bicutan ng naturang siyudad.
Blanko pa ang pulisya sa pagkakakilanlan ng suspect at nagsasagawa pa ng follow-up investigation hinggil dito.
Sa report na natanggap ng Southern Police District (SPD), naganap ang insidente alas-2:30 ng madaling araw sa naturang lugar habang nakatayo si Pagaduan sa lugar nang biglang dumating ang suspect at walang salitang pinagbabaril ito na naging dahilan ng kanyang kamatayan.
Mabilis namang tumakas ang suspect matapos ang isinagawang krimen.
Sa rekord ng Taguig City Police retiradong tauhan ng BJMP ang biktima at dahil wala na ito sa serbisyo nasangkot na ito sa pagtutulak ng droga sa lungsod ng Taguig at kalapit na siyudad.
Narekober ng pulisya ang apat na plastic sachet ng shabu at drug paraphernalias. Sa ngayon ay iniimbestigahan pa ang nasabing pamamaril.
- Latest