Kabataang Muslim nagrali, nanawagan ng kapayapaan sa Marawi
MANILA, Philippines - Sa kabila ng murang isipan, nagsagawa ng tila kilos-protesta ang mga batang Muslim para ipahayag ang kanilang saloobin sa harap ng Golden Mosque sa Quiapo, Maynila, kaugnay sa nagaganap na bakbakan sa Marawi City, kahapon ng umaga.
Naroroon ang mga bata at kanilang mga magulang at kaanak dahil sa paggunita ng Ramadan.
Bitbit ng mga bata, pati ang mga musmos ang mga placard na may nakasulat na “Peace For Marawi”.
Nais ng mga kabataan na matapos na ang nagaganap na kaguluhan sa Marawi, bagamat hindi pa nila ganap na nauunawaan kung ano ang martial law na idineklara sa Mindanao.
Ayon sa administrator ng Manila Golden Mosque and Cultural Center na si Hajji Moh’d Ersad Malli, hindi sila kontra sa pagpapatupad ng martial law sa Mindanao dahil mabibigyan ng proteksiyon sa pamamagitan nito ang mga inosenteng sibilyan at magiging daan para maibalik ang kaayusan sa Marawi City.
Mariin ding kinondena ng mga Muslim sa Golden Mosque ang pag-atake ng mga tero-rista ngayong banal na buwan ng Ramadan.
- Latest