Parak utas sa pananambang
MANILA, Philippines - Isang 43-anyos na mi-yembro ng Philippine National Police at dating nakatalaga sa National Capital Region Police Office (NCRPO) ang nasawi matapos pagbabarilin habang nagmamaneho ng kaniyang sasakyan, ng tatlong lalaki na sakay ng dalawang motorsiklo, sa Quezon St., Tondo, Maynila, kahapon ng madaling araw.
Kinilala ni Senior Inspector Rommel Anicete, hepe ng Manila Police District-Homicide Section ang biktimang si PO2 Frederick Tolentino, residente ng Rawis Compound, Tondo, Maynila. Siya ay dating naka-assign sa MPD bago nailipat sa Regional Personnel Holding Account Unit (RPHAU).
Inaalam pa ang pagkilanlan sa mga armadong suspek sa pananambang na tumakas sa direksiyon ng northbound ng Quezon St.
Sa ulat ni PO3 Michael Maraggun, naganap ang ambush dakong alas-12:20 ng madaling araw kahapon sa naturang lugar. Nakaparada ngayon sa MPD Headquarters compound ang sasakyan ng biktima na isang kulay silver na Toyota Corolla Altis na may plakang XHS 721, para sa bullet trajectory examination.
Sa pagresponde sa crime scene, dinatnan ang biktima na walang buhay at nakayuko sa driver’s seat, na ayon sa grupo ng SOCO ay nagtamo ng tama ng bala sa leeg at likod ng tenga.
Habang tinatahak umano ni Tolentino ang nasabing lugar ay bumubuntot na sa kaniya ang dalawang motorsiklo sakay ang tatlong suspek kung saan niratrat nila ang sasakyan ng biktima.
Sinabi ni PO3 Maraggun na patuloy pa ang beripikasyon sa mga kasong kinasasangkutan ng biktima at iba pang rekord nito na maaaring pagbatayan sa kaso.
Noong Hunyo 2014, si Tolentino ay inaresto ng National Bureau of Investigation (NBI) dahil sa pagkakasangkot sa kidnapping ng Korean businessman na si Hyun Koo-yeo noong Abril 2014. Nakapagbigay ang biktima ng halagang P4-milyon sa hinihinging P20-milyon.
Gamit na ebidensya ng awtoridad ang natuntong sasakyan na nakaparada sa labas ng kaniyang bahay, na gamit umano sa pagdukot, isang silver Toyota Altis XHS 721 at nakarehistro sa pangalan niya.
- Latest