Vendor nagpautang na, pinatay pa
MANILA, Philippines – Patay ang isang vendor nang barilin ng isang lalaki na may utang sa kaniya nang magkasalubong sila sa Tondo, Maynila, kamakalawa ng umaga.
Sa ulat kahapon ni PO3 Jorlan Taluban ng Manila Police District-Homicide Section, nagawa pang isugod sa Mary Johnston ang biktimang si Bernard Bonnie Franco, 36, residente ng C. P. Garcia St., Tondo, pero hindi na rin naisalba ang buhay nito dahil sa tinamong tama ng bala ng baril sa dibdib.
Isang alyas Mac-mac ang pinaghahanap ng pulisya na tumakas matapos ang pamamaril.
Nabatid na dakong alas-10:30 ng umaga nang magkasalubong ang dalawa sa Duhat St., malapit sa panulukan ng C. P. Garcia St., Tondo.
Napag-alaman na may pagkakautang ang suspek sa biktima at matagal nang hindi umano nagpapakita hanggang sa magkrus ang landas nila.
Kasama umano ng biktima ang isang Bryan Cruz nang makasalubong nila ang suspek na mistulang nagulat pa.
Posible umanong umiiwas ang suspek at nagkataon na nakita ang biktima at sa halip na makiusap ay bumunot ng baril at pinutukan ang biktima sa dibdib at saka tumakas.
Dinala naman ni Cruz sa pagamutan ang kaibigan.
- Latest