Bukiron, Navarro nagmangtas sa tagsa-tagsa nila ka koponan sa Triple-A Caging

CEBU, Philippines - Nagmangtas sila si Geryl Bukiron ug Orly Navarro aron pangulohan ang tagsa-tagsa nila ka koponan batok sa managlahing kaatbang sa Triple-A Christmas League 2016 sa miaging adlaw didto sa Kimwa gym sa Barangay Subangdaku, dakbayan sa Mandaue.

Si Bukiron mipahaguros og lima ka triples sa iyang 19 puntos alang sa D’ Lurics Enterprises nga midaog na sab batok sa Allied sa iskor nga 66-57, samtang si Navarro mikabkab og 13 puntos sa Iesieken nga midemolis sa Salt City, 64-52.

Ang D’ Lurics Enterprises ni Dodong Lurica ug Iesieken ni Dandy Tagalog kasamtangang nagsawo sa liderato sa managsama nilang 3-1 nga baraha.

Sa pasiunang duwa, ang team Monterroyo ni Dr. Raul Monterroyo midaog na gyud batok sa JW Game Farm ni Jamz Manatad sa iskor nga 64-51.

Ang Monterroyo nagbitbit na og 1-2 nga baraha, samtang ang JW Game Farm adunay 2-1 record ning maong liga  nga ubos sa superbisyon ni Triple-A president Gilbert Lesin.

Gawas ni Bukiron, lain pang mihimo og double figures sa D’ Lurics Enterprises mao si Alexam Amaga nga mitimang og 15 puntos, gisundan ni Rex Gonzaga nga mitikdol og 14 puntos. Ang sentro nga si Opong Englis miligwat og 10 puntos ug milangkat og walo ka rebounds sa D’ Lurics Enterprises nga dominante kaayo gikan sa sinugdanan hangtod sa katapusang gutlo.

Bugtong si Erwin Budiongan lang ang miiskor og double digits sa Allied pinaagi sa iyang 14 puntos kay gipangdemalas sila si Lesin ug Merot Ygoña, kansang team wala gyud makasuway og labaw.

Ang Iesieken sa ilang bahin, si Navarro nakakuha sab og suporta gikan ni Loloh Sicad nga mitampo og 10 puntos, si Robert Cuerbo igo lang miiskor og nuybe puntos, apan aduna kini 12 ka rebounds sa Iesieken nga milansang sa ilang kinadak-ang labaw, 31-18 sa third period.

Natipakan hinuon ang labaw ngadto sa sayes puntos, 33-39  sa nahabiling kuwatro minutos sa maong kuwarter sa mga paningkamot nilang Johnrey Gorgonio ug Arnel Montalban.

Si Gorgonio misansan og 21 puntos, samtang si Montalban adunay otso puntos.

Ang mga duwa gidumala ni league commissioners Crismart Martinito ug Jun Arceo sa abag ni Orly Navarro.  (BANAT NEWS)

PUNTOS MATAG USA

Unang duwa:

D’ Lurics Enterprises (66) – Bukiron 19, Amaga 15, Gonzaga 14, Englis 10, Gacasan 4, Ferolino 2, Jacalan 2.

ALLIED (57) – Budiongan 14, Lesin 9, Ygoña 8, Mendoza 7, Ecot 6, Soco 3, Bordaje 2, Gogo 2, Aringo 2, Arceo 2, Crismart 2.

Ikaduhang duwa:

IESIEKEN (64) – Navarro 13, Sicad 10, Cuerbo 9, Mahusay 8, Yares 6, Tagalog 6, Suson 4, Grafe 3, Lumen 3, Yatan 2.

SALT City (52) – Gorgonio 21, Montalban 8, Palero 7, Jarlata 4, Cabucos 3, Varro 3, Lugas 2, Cardoza 2, Magale 2.