Barangay officials, kabilang sa 32 high-value drug suspects ng MPD
MANILA, Philippines – Umaabot sa 32 high-value illegal drugs suspects ang tukoy na ng Manila Police Districts na kinabibilangan ng mga barangay chairman at kagawad bunsod na rin ng pagiging drug protector at big time drug dealer ng mga ito.
Sa ginanap na Manila City Hall Press Club Newsbreak sa Cherry Blossoms Hotel sa Ermita, sinabi ni MPD Director Sr. Supt. Joel Coronel na minamanmanan na ng kanyang tauhan ang galaw ng mga suspects kabilang ang nagtatago na sa mga probinsiya. Ayon kay Coronel, nakakalungkot lamang na kasalukuyang nasa puwesto ang mga high-value suspects na dapat sana ay ehemplo sa kanilang mga nasasakupan.
Samantala, binigyan diin din ni Coronel na nailipat na ang 16 na ninja cops na nagre-recyle ng mga kinumpiskang illegal drugs sa Mindanao at Cordillera Region. Subalit tumanggi na itong pangalanan pa ang mga pulis. Matatandaang nag-alok ng pabuyang P2 milyon si Pangulong Rodrigo Duterte sa ikadarakip ng mga ninja cops.
Kaugnay nito, tatlong pulis din ang nagpositibo sa droga na ngayon ay nahaharap sa kasong kriminal at administratibo. Bagamat hindi na ibinunyag ang pangalan na nakatalaga ang mga ito sa MPD headquarters, Police Station 11, at Police Station 4. Bunsod nito, pabor si Coronel na isagawa buwan-buwan sa pamamagitan ng random test ang drug tests sa 4,405 MPD police personnel.
- Latest
