Tanod, utas sa tandem
MANILA, Philippines – Isang barangay tanod ang pinagbabaril hanggang sa mapatay ng hindi pa nakikilalang riding-in tandem sa Pasig City, kamakalawa ng gabi.
Ang biktima ay kinilalang si Reynante Nudo, 47, ng Brgy. Manggahan, Pasig City.
Ang pamamaril sa biktima ay naganap dakong alas-10:25 ng gabi sa Westbank Road, Brgy. Rosario Pasig City.
Sa imbestigasyon ni PO3 Rex Baygar, nabatid na ang biktima at kaibigan nito na si Joseph Bitara ay sakay ng motorsiklo nang dikitan sila ng mga suspek na kapwa naka-bonnet at walang sabi-sabing pagbabarilin ang biktima.
Matapos ang pamamaril at matiyak na patay na ang biktima ay agad na tumakas ang mga suspek at hindi naman sinaktan si Bitara.
Nabatid na ang tanod ay kabilang sa drug watchlist sa kanilang lugar.
Nagsasagawa pa ng masusing imbestigasyon ang pulisya para matukoy at madakip ang mga salarin.
- Latest