4 pa bulagta sa droga
MANILA, Philippines – Patay na naman ang apat katao kabilang ang isang bading na pawang sangkot sa droga matapos pagbabarilin ang mga ito sa magkakahiwalay na insidente sa Parañaque, Las Piñas City at bayan ng Pateros kamakalawa.
Sa Parañaque City, dead on the spot ang dating ‘tulak’ na si Michael Angelo Torres, alyas Michael Galis ng Brgy. Sun Valley ng naturang lungsod.
Alas-10:00 ng gabi nang magsagawa ng buy-bust operation ang pulisya sa harapan ng bahay ng suspect na si Torres sa naturang lugar.
Nakatunog umano si Torres na ang ka-transaksiyon niya ay isang pulis, kung kaya’t inilabas nito ang kanyang baril at tinangkang barilin umano ang mga aaresto sa kanya.
Dito na pinaputukan ng mga pulis ang naturang suspect na naging dahilan ng agaran nitong kamatayan.
Alas-7:05 ng gabi ay binaril at napatay ang barker na si Luis Bravante, 44, ng Block 3, Lot 8, Seaside Square, Brgy. Tambo ng naturang lungsod ng riding in tandem sa kahabaan ng MIA Road ng naturang barangay.
Kaagad na binawian ng buhay ang biktima sanhi ng ilang tama ng bala sa ibat-ibang bahagi ng katawan buhat sa kalibre .45 baril.
Sinasabing ‘tulak’ umano ng droga ang nasawi na inamin naman ng kinasama nitong nakilala lamang sa pangalang Sherlyn.
Sa report naman Las Piñas City Police, ala-1:30 kahapon ng madaling-araw nang pagbabarilin at mapatay ng hindi pa nakikilalang mga suspect ang umano’y bading na biktimang si John Abellana, alyas Iwa, 22, isang beautician malapit sa tinitirhan nito sa Avocado St., Brgy. CAA ng naturang lungsod.
Sa impormasyong nakalap ng Las Piñas City Police sa ilang saksi, kilala umanong nagbebenta ng ipinagbabawal na gamot si Abellana sa naturang lugar.
Ayon naman sa Pateros Police, alas-12:45 ng madaling araw nang pagbabarilin din hanggang sa mapatay si Michael Dela Cruz, alyas Banjo, 23, miyembro ng Fire Boat Unit sa Pasig City, nakatira sa San Joaquin ng naturang lungsod sa kahabaan ng M. Almeda St., Brgy. Santo Rosario-Silangan, Pateros ng riding in tandem na kapwa nakasuot ng bonnet.
Ayon sa barangay nasa listahan ng mga drug personality ang nasawing biktima.
- Latest