Problemado sa pera, ama nagbaril sa sarili
MANILA, Philippines – Dahil umano sa problema sa pera, isang ama ang nagbaril sa sarili sa Tondo, Maynila kamakalawa.
Patay na nang dalhin sa Mary Johnston Hospital ang biktimang si Edmund Cruz, ng Coral St. Tondo Maynila sanhi ng tama ng bala ng baril sa katawan.
Ayon sa isinagawang imbestigasyon ni SPO3 Milbert Balinggan ng Manila Police District Homicide Section, dakong alas-10:30 ng gabi ng maganap ang insidente sa loob ng bahay ng biktima.
Nabatid na natutulog si Ranielle, anak ng biktima nang nakarinig ito ng isang putok at nang kanyang tignan ay nakita niyang nakahandusay ang kanyang tatay at naliligo sa sariling dugo na naging dahilan upang isugod sa pagamutan pero idineklara itong patay.
Ayon sa pamilya ng biktima, problema sa pera ang nakikita nilang dahilan upang magpakamatay ito.
- Latest
