3 Taiwanese huli sa 275-M ng shabu
MANILA, Philippines – Arestado ang tatlong Taiwanese nationals matapos makumpiskahan ang mga ito ng may 55 kilo ng shabu na tinatayang nagkakahalaga ng P275 million sa isang buy-bust operation na isinagawa ng National Capital Regional Police Office (NCRPO) kung saan natuklasan din ang isang mini laboratory sa isang exclusive subdivision sa Muntinlupa City, kahapon ng madaling araw.
Kinilala ni NCRPO Director Joel Pagdilao ang mga naarestong suspect na sina Pong Jung, 19; Chen Hu Min, 27 at Eugene Chong, 24, pawang naninirahan sa Tamarind Drive, Ayala Alabang Village ng nasabing lungsod.
Lumalabas sa imbestigasyon ng pulisya, ala-1:15 ng madaling araw nang arestuhin ng mga tauhan ng Regional Anti-Illegal Drugs (RAID) ang mga suspect sa naturang lugar nang bentahan ni Pong Jung ng 25 kilo ng shabu na nagkakahalaga ng P25 milyon ang isang pulis na nagpanggap na poseur buyer.
Matapos ang naturang transaksiyon, agad na sinalakay ng naturang operatiba ang nasabing bahay kung saan natuklasan sa loob nito ang isang maliit na laboratoryo at narekober ang halos 55 kilong shabu na tinatayang nagkakahalaga ng P275 milyon, iba’t-ibang kemikal na sangkap at kagamitan sa paggawa ng nasabing droga.
Sinabi ni Pagdilao, lima hanggang 10-kilo ng shabu bawat araw ang nagagawa sa nabanggit na laboratory, na matatagpuan mismo sa nabanggit na exclusive subdivision at pagkatapos ay ipinapakalat ang naturang droga sa iba’t ibang lugar sa Metro Manila.
Ang mga suspect ay nakakulong ngayon sa NCRPO detention cell, Camp Bagong Diwa, Taguig City at sasampahan ang mga ito ng kasong Comprehensive Dangreours Drugs Act of 2002.
- Latest