Solo parent summit inilunsad sa Quezon City
MANILA, Philippines - Sama-samang inilunsad kahapon ng umaga ng iba’t ibang opisyal sa lungsod Quezon sa pangunguna ni House Speaker at QC Rep. Feliciano “Sonny” Belmonte, Mayor Herbert Bautista, Vice Mayor Joy Belmonte kasama sina Tesda Secretary at Congressman Joel Villanuena at Bicol Rep. Leni Robredo ang kauna-unahang ‘‘Solo Parent Summit’’ na ginawa sa Amoranto Theater.
Tampok sa okasyon ang pagkilala sa kahalagahan ng mga solo parent sa pagtataguyod ng buhay ng kani-kanilang pamilya.
“Isali ninyo ako sa solo parent, pero malalaki na ang mga anak ko ng ako’y ma-ging solo parent, kayo na naging mga solo parent ay higit na mapapangalagaan sa pamamagitan ng pagkakaloob ng mga livelihood programs, edukasyon ng mga anak, discounts sa mga bilihin laluna ng gamot at gatas ng mga anak, kayat kami po sa kongreso ay patuloy na gumagawa ng paraan upang kayo ay masakop ng batas na katulad ng mga senior citizens na may mga benepisyong natatanggap sa gobyerno”, pahayag ni Speaker Belmonte sa harap ng may mahigit 1,000 solo parent na dumalo sa okasyon.
“Humanap kayo at umisip ng mga praktikal na bagay na puwede naming maibigay, hindi lamang sa papel at salita kundi sa makatotohanang benepisyo, you have to focus to your common sense para maayos ang buhay, iwasan ninyo na dagdagan pa ang problema, kami naman ay patuloy na humahanap ng paraan na matulungan kayo, kung makaka-discount kayo sa mga supermarket o mga pamilihan ay gagawin naming sa Kongreso” dagdag ni Speaker Belmonte.
Hinikayat naman ni Mayor Bautista ang mga solo parent na huwag nang dagdagan ang bilang ng mga anak dahil may ilan anya na kahit solo parent na ay nadadagdagan pa rin ang bilang kayat nahihirapang makaangat sa buhay dahil sa lumalaking pangangailangan.
“Kaya nga sinasabi ko sa inyo na dapat kayong palagiang maging matatag ang kalooban, ginagawa natin ang lahat para mabigyan kayo ng kaukulang proteksiyon at maayos ang pamumuhay at mapagkalooban kayo ng patas na pangangalaga sa lipunan at higit na pansin”, pahayag naman ni Vice Mayor Belmonte na siyang nagsusulong ng Solo Parent project sa QC.
Nagkaroon din ng open forum sa okasyon kung saan marami sa mga solo parent na nasa okasyon ay nagkaroon ng trabaho makaraang sumailalim sa mga kursong pinangasiwaan ni Villanueva sa Tesda.
Kinilala naman ni Robredo ang hirap at pagtitiis ng mga solo parent para sa kapakanan ng mga anak,na gaya anya niya ay naging ganito rin nang maging solo parent makaraang yumao ang asawang si dating DILG Secretary Robrero.
Hinihikayat din ni Vice Ma-yor Belmonte ang iba pang local executives na bigyang pansin din ang pagkakaroon ng mga proyekto para sa mga solo parent para matulungang maiangat ang kabuhayan ng mga ito sa kani-kanilang komunidad.
- Latest
