Roxas Boulevard bubuksan muli sa mga truck – MMDA
MANILA, Philippines - Simula sa Lunes (Pebrero 2) ay pansamantalang papayagan ng Metropolitan Manila Development Authority (MMDA) ang mga truck na dumaan sa kahabaan ng Roxas Boulevard.
Ito ay matapos na pirmahan ni MMDA Chairman Francis Tolentino ang isang memorandum circular na nagbibigay pahintulot sa mga trucks na gamitin o dumaan sa kahaban ng Roxas Boulevard simula sa Lunes, mula alas-12:00 ng hatinggabi hanggang alas- 5:00 ng madaling-araw.
Sinabi ng MMDA, na dalawang linggo lamang umano ito magiging epektibo, simula Pebrero 2 hanggang Pebrero 15 ng taong kasalukuyan.
Nilinaw ni Tolentino, na hindi ito ipapatupad sa umaga ng Pebrero 7 at 14 dahil inaasahang makadagdag ito sa matinding trapik dahil weekends.
Naniniwala si Tolentino na makakatulong rin ito sa sinisikap ng pamahalaan na malutas ang problema ng port congestion.
Sinabi pa ni Tolentino, na pagkatapos aniya nito ay nakatakda nang isailalim ng Department of Public Works and Highways (DPWH) sa rehabilitasyon ang Roxas Blvd.bilang preparasyon naman sa idadaos ng APEC summit sa darating na Nobyembre.
Matatandaan na noong Disyembre ng nakaraang taon ay nagpatupad ng bagong truck regulation ang MMDA sa kahabaan ng Roxas Boulevard bilang bahagi ng paghahanda sa pista ng Itim na Nazareno at sa Papal visit.
- Latest