Binata, hulog sa veranda

MANILA, Philippines - Patay ang isang 24-anyos na binata nang mahulog mula sa veranda ng kanilang tahanan sa Pasig City kahapon ng umaga.

Bali sa tadyang ang ikinasawi ng biktimang si Daryll Ilao, ng Unit 4B, Queensland St., Greenpark Village, Bgy. Manggahan, Pasig City.

Batay sa initial report ni SPO1 Rolando Anselmo, Jr., ng Station Investigation Detection Management Branch (SIDMB) ng Pasig City Police, nabatid na dakong alas-6:00 ng umaga nang maganap ang aksidente sa mismong veranda ng kanilang tahanan, na tinatayang nasa 40-talampakan ang taas.

Hindi pa naman umano matukoy ng mga imbestigador kung paanong nahulog ang biktima sa veranda dahil hindi pa umano nila makausap ang live-in partner nito na na-shock sa pangyayari at iyak lamang umano ng iyak.

Sa kuwento naman ng mga kasambahay ng biktima, nakarinig na lamang umano sila ng kalabog at nang kanilang tingnan ay nakita nilang nakabulagta na ang biktima sa sementadong ground floor.

Isinugod pa umano nila ito sa St. Anthony Hospital sa Marikina City ngunit nasawi rin.