Kelot bulagta sa riding-in-tandem
MANILA, Philippines - Apat na tama ng bala sa ulo ang tumapos sa buhay ng isang lalaki na pinagbabaril ng riding in tandem suspek sa lungsod Quezon, kamakalawa ng gabi.
Si Billy Dijamco, 39, ng Brgy. Commonwealth ay agad na binawian nang buhay sa lugar makaraan ang krimen, ayon kay PO3 Jaime de Jesus, imbestigador sa kaso.
Mabilis namang nagsitakas ang mga suspect lulan ng motorsiklo at kapwa nakasuot ang mga ito ng helmet.
Nangyari ang insidente sa harap ng isang salon sa Block 4, Lot 8, Don Fabian St., Brgy. Commonwealth, ganap na alas-10:40 ng gabi. Sabi ng isang testigo, nakita niya ang pagdating ng dalawang lalaki na sakay ng isang motorsiklo at huminto malapit sa lugar.
Matapos ito, bumaba ng motorsiklo ang backrider at biglang nagbunot ng baril habang papalapit sa walang kamalay-malay na biktima na nakatayo sa lugar saka ito pinagbabaril sa ulo.
Dead-on-the-spot ang biktima, habang ang mga suspek naman ay mabilis na tumakas papalayo sa nasabing lugar.
Sa pagsisiyasat ng Scene of the Crime Operatives (SOCO) narekober nila sa crime scene ang limang basyo ng kalibre 45 baril at isang tingga nito.
Blangko pa ang pulisya sa motibo sa naganap na pagpaslang habang patuloy pa rin ang isinasagawang imbestigasyon ukol dito.
- Latest