Police chief dedo, 4 sugatan sa road mishap
MANILA, Philippines — Kamatayan ang sinapit ng 54-anyos na hepe ng pulisya habang apat naman ang nasugatan makaraang magsalpukan ang dalawang sasakyan sa kahabaan ng Cotabato-Davao Highway sa KM 110, Barangay Amas, Kidapawan City, North Cotabato kamakalawa ng hapon.
Kinilala ang police chief na si P/Chief Inspector Raymund Sarmogenes, officer in charge ng Antipas Municipal Police Station sa North Cotabato.
Isinugod naman sa pagamutan ang mga nasugatang biktima na sina Joselito de Julian Aberde, 51, driver ng Mitsubishi jeep (LMP -598); Maria Aberde, Jenny Joy Aberde, at si Johnrey Aberde.
Base sa police report na nakarating sa Camp Crame, kasalukuyang minamaneho ni Sarmogenes ang asul na Toyota Avanza (ZJP 509) sa nasabing highway nang makabanggaan nito ang berdeng Mitsubishi jeep (LMP 598) na minamaneho ni Joselito Aberde na lulan ang tatlo pang nasugatang biktima.
Ayon sa pulisya, pabalik na si Sarmogenes sa himpilan ng pulisya mula sa Cotabato Police Provincial Office nang makasalubong si kamatayan. Sa lakas ng pagkakabangga ay nagtamo ng matinding sugat sa ulo ang nasabing hepe na idineklarang patay sa Cotabato Provincial Hospital.
- Latest