Welder kinatay ng 2 kasama
LEGAZPI CITY, Albay , Philippines — Napatay ang 38-anyos na welder matapos itong pagtulungang pagtatagain ng dalawang kasamahan sa trabaho kaugnay sa sinasabing paniningil ng utang sa Barangay Layog sa bayan ng Barcelona, Sorsogon kamakalawa ng gabi. Namatay noon din ang biktimang si Rodolfo Jebulan ng Barangay Salog habang agad namang naaresto ang mga suspek na sina Pedro Dioneda, 38; at Armando Escauriaga, 51, kapwa nakatira sa Barangay Carriedo sa bayan ng Gubat. Sa police report na nakarating sa Camp Simeon Ola, nag-uusap ang tatlo kaugnay sa paniningil ng pautang nang biglang sumiklab ang mainitang pagtatalo. Pinagtulungang pagtatagain ng mga suspek ang biktima hanggang sa duguang bumulagta. Narekober sa mga suspek ang itak na ginamit sa pananaga habang sinampahan ng kaukulang kaso ang dalawa.
- Latest