P3.4-M Christmas bonus ng mga kawani, tinangay
LEGAZPI CITY, Albay, Philippines —Umaabot sa P3.4 milyong Christmas bonus ng 115 kawani ng munisipyo ang naglaho makaraang tangayin ng bodyguard ng municipal treasurer sa Naga City, Camarines Sur noong Martes ng umaga.
Pinaghahanap na ang suspek na si Melchor Abrazado, sinasabing dating administrative assistance ni Tinambac Mayor Ruel Tuy sa loob ng 18 taon bago naging bodyguard ni Ma. Theresa Hermogenio-Betito.
Base sa police report na nakarating sa Camp Simeon Ola, magkakasama sina Betito, bodyguard nito at dalawa pang kawani ng munisipyo na nag-withdraw ng malaking halaga sa LandBank of the Phils. sa Barangay Sta. Cruz, Naga City.
Gayunman, nang iabot ng teller ng banko kay Betito ang P 3, 426, 340.55 ay inilagay nito sa bag saka ibinigay kay Abrazado.
Kaagad na nagpaalam ang suspek para tawagin ang kanilang drayber pero makalipas ang isang oras ay hindi na ito bumalik.
Sinubukang tawagan ang suspek sa kanyang cellphone pero hindi na makontak kaya kaagad na ipinagbigay-alam sa pulisya.
Isinailalim naman sa imbestigahan ng pulisya ang mga kasamahang kawani na nag-withdraw ng malaking halaga.
- Latest