Pagtaas ng bilang ng mga namatay sa Dengvaxia vaccine, ikinabahala
Sa ginawang pagsusuri ng kanilang forensic expert na si Dr. Erwin Erfe, 7 sa mga namatay ay positibo na nabakunahan ng Dengvaxia ay kinakitaan nila ng pagdurugo ng utak, baga at iba pang vital parts na sintomas ng pagkakaroon ng dengue virus at yellow fever na galing sa dengue. AFP/File
MANILA, Philippines — Nakababahala na umano ang pagtaas ng bilang ng mga batang nagkakasakit at kaagad na namamatay matapos maturukan ang mga ito ng Dengvaxia.
Ito ang sinabi ni Public Attorney’s Office (PAO) Chief Atty. Persida Acosta kaya’t umaapela ito sa mga ahensiya ng pamahalaan na sangkot sa pagbabakuna ng Dengvaxia na kumilos upang maisalba ang buhay ng libu-libong mag-aaral sa public school na naturukan ng anti-dengue vaccine.
Sa ginawang pagsusuri ng kanilang forensic expert na si Dr. Erwin Erfe, 7 sa mga namatay ay positibo na nabakunahan ng Dengvaxia ay kinakitaan nila ng pagdurugo ng utak, baga at iba pang vital parts na sintomas ng pagkakaroon ng dengue virus at yellow fever na galing sa dengue.
Nanawagan si Acosta sa Department of Education (DepEd) at Department of Health (DOH) na ibigay ang data ng mga batang nabakunahan ng Dengvaxia upang maidokumento at masubaybayan.
Nabatid na umaabot sa 833,000 public school student na may edad 9 pataas ang nabakunahan ng Dengvaxia.
Nanawagan din si Acosta sa mga magulang na huwag nang hintayin pa na makitaan ng sintomas ng sakit ang mga bata upang hindi mameligro ang kanilang mga buhay.
- Latest
