Dating AFP Chief Villanueva kinasuhan ng Ombudsman

MANILA, Philippines — Dahil sa umano’y maanomalyang P53-M refund sa isang New York based company nang siya pa ang postmaster general noong 2003 ay kinasuhan ng graft ng tanggapan ng Ombudsman sa Sandiganbayan si dating AFP chief Diomedio Villanueva.

Kapwa akusado ni Villanueva sina dating Assistant Postmaster General Antonio Siapno nang noo’y  Accoun­ting Department acting director Leonido Basilio.

Nag-ugat ang kaso sa umano’y maanomalyang refund ng P53 milyon na ibinigay ng Phil Postal Corporation (PPC) sa Philpost USA, isang  New York-based corporation na may alam sa remailing services sa mga American citizens  gamit ang Philippine Postage Indicia.

Sinasabing ang mga respondents ay nagkutsabahan nang i-refund ang $1 milyon o  P53 milyon sa isang kumpanya bilang representation ng Terminal Dues paid sa mga naipadadalang sulat sa Royal Mail sa United Kingdom.

Binigyang diin ng Ombudsman na naisagawa pa ng mga respondents ang refund kahit alam ng lahat na ang Philpost USA ay hindi entitled  sa refund dahilan para magkaroon ng deficit sa kita ang PPC.