Vice mayor itinumba
MANILA, Philippines — Pinagbabaril hanggang sa mapatay ng hindi pa nakikilalang suspect ang isang bise alkalde sa naganap na karahasan sa Brgy. Dangay, Roxas, Oriental Mindoro, Biyernes ng hapon.
Kinilala ni Supt. Imelda Tolentino, Spokesperson ng MIMAROPA Police (Mindoro, Marinduque, Romblon, Palawan) ang nasawing biktima na si Roxas Vice Mayor Jackson Cinco Dy, 58, residente ng Brgy. Bagumbayan sa kanilang bayan.
Sa imbestigasyon, sinabi ni Tolentino, nangyari ang insidente alas- 4:30 ng hapon sa Brgy. Dangay, Roxas ng naturang lalawigan.
Kasalukuyan umanong nanonood ng telebisyon sa Christian Car Wash ang biktima habang hinihintay ang pinalilinisang SUV (Toyota Fortuner) nang biglang sumulpot ang gunman.
Armado ng hindi pa natukoy na kalibre ng armas ay bigla na lamang pinagbabaril sa ulo ng salarin si Dy na duguang bumagsak na ilang segundo lang ay binawian ng buhay.
Nagsilbi namang lookout sa krimen ang kasamahan ng suspek na driver ng motorsiklo na ginamit din sa pagtakas.
Sa kasalukuyan, dalawang anggulo ang sinisilip ng mga awtoridad na motibo ng krimen, una ay hidwaan sa pulitika at ikalawa ay personal na alitan.
Patuloy ang masusing imbestigasyon sa kasong ito upang matukoy at mapanagot sa batas ang mga salarin.
- Latest