Preliminary investigation, hiniling ni Solano

MANILA, Philippines — Bukas, araw ng Lunes pa inaasahang maihahain ang pormal na reklamo laban sa pangunahing suspek na si John Paul Solano kaugnay sa pagkamatay ng hazing victim na si Horacio Tomas Castillo III.

Ayon kay Supt. Erwin Margarejo, tagapagsalita ng Manila Police District (MPD), na hinihintay pa rin nila ang ihahaing formal complaint ng pamilya Castillo laban kay Solano.

Hindi pa rin isinailalim sa inquest proceedings sa reklamong perjury at anti-hazing law si Solano matapos itong lumagda sa waiver of detention dahil mas gusto niyang maisailalim sa preliminary investigation upang mas maidepensa ang sarili.

Nangangahulugan na hindi umano malalabag ang 36-na oras na reglementary period para ituloy pa ang pagdetine kay Solano.

 “Tumatakbo na kasi yung ating reglementary period na 36 hours considering that we will be filing a violation of Anti-hazing law.... so ang reglementary period dyan ang maximum ay 36 hours before we can inquest him”, ani Margarejo.

Dinagdag din ni Margarejo na ang voluntary surrender ay na­ngangahulugan na rin ng pagkakadakip at kung alas- 5:00 ng hapon sumurender si Solano, mayroon lamang na 36 na oras ang MPD upang isalang ito sa inquest proceedings.

Hindi pa rin aniya, masasabi kung maaring gawing state witness si Solano kahit iginigiit nito na wala siyang kinalaman sa hazing dahil kailangan munang i-asses ang kaniyang statement o isusumiteng affidavit kung maaari siyang pumasok bilang testigo.