Jalalon, Pingris kikilalanin sa 24th PBAPC Awards

MANILA, Philippines — Magsasama sa ibabaw ng entablado sina Star guard Jio Jalalon at forward Marc Pingris at champion coach Tim Cone ng Barangay Ginebra sa pagdaraos ng PBA Press Corps (PBAPC) ng 24th Annual Awards sa Nobyembre 30 sa Gloria Maris Restaurant sa Gateway Mall sa Cubao, Quezon City.

Hinirang si Jalalon bilang Mr. Quality Minutes, habang sina Pingris at Cone ang babandera sa All-Interview team na kikilalanin ng mga sportswriters na regular na nagkokober ng PBA beat sa formal affair na inihahandog ng Cignal TV.

Tinalo ni Jalalon sina Kelly Williams ng TNT Katropa, Reynel Hugnatan ng Meralco at Sol Mercado ng Ginebra) para sa nasabing award na itinulad sa Sixth Man Award ng NBA.

Nagtala si Jalalon ng average na 9.3 points sa kanyang rookie season para sa Hotshots.

Makakasama naman nina Pingris at Cone sa All-Interview team sina Ranidel de Ocampo ng Meralco, Castro ng TNT Katropa, Beau Belga ng Rain or Shine at LA Tenorio ng Ginebra.

Ang award ay bilang pagkilala sa mga players, coaches at perso-nalities na nagbibigay ng magagandang quotes at palagiang bukas para sa panayam ng mga PBAPC members.

Matatanggap din ni Tenorio ang Order of Merit honor para sa kanyang pinakamaraming Player of the Week citation sa nakaraang season.

Si Globalport guard Terrence Romeo ang mu-ling kinilala bilang Mighty Sports Scoring Champion sa ikatlong sunod na pagkakataon, habang si top rookie Roger Pogoy ng TNT katropa ang namumuno sa All-Rookie team kasama sina Jalalon, Matthew Wright (Phoenix), Kevin Ferrer (Barangay Ginebra) at Reden Celda (KIA).