Antonio nakisosyo sa liderato

MANILA, Philippines — Nakisosyo sa liderato si Filipino Grand Master Joey Antonio matapos ungusan si Slovakian GM Pavel Certek sa marathon 79-move win ng Queen’s Pawn game sa fifth round ng 50-and-above division ng 27th World Senior Chess Championship sa Acqui Teme, Italy.

Tumabla ang 55-anyos na si Antonio kay Peruvian GM Julio Granda Zuniga sa pangunguna sa torneo sa magkatulad nilang 4.5 points.

Nakipag-draw naman si Zuniga kay Georgian GM Zurab Sturua.

Kasalukuyan pang naglalaro sina Antonio at Zuniga para paglabanan ang solong liderato habang isinusulat  ang balitang ito.

Bago lusutan si Certek ay nanggaling muna si Antonio sa magaang na panalo kung saan dinaig niya si Ukrainian International Master Alexander Reprintsev sa fourth round.

Nagkamali si Reprintsev ng pagkakalagay sa kanyang queen na sinamantala ni Antonio para tapusin ang laro matapos ang tatlong moves.

Nauna nang pinaluhod ni Antonio sina Mexican Hernandez Andres Belmont at German Karl-Heinz Kannenberg sa first at second round, ayon sa pagkakasunod habang nakipag-draw naman siya kay Indian IM Devaki Prasad.

Samantala, binigo naman ni Filipino GM Eugene Torre si German FIDE Master Peter Hohler para sa kanyang 3.5 points sa 60-and-above class.

Parehong may 4.5 points sina French GM Vladimir Okhotnik, Czech GM Vlastimil Jansa at Israeli FM Boris Gutkin para manguna sa nasabing kategorya.