Petron inilabas agad ang lakas
MANILA, Philippines — Pinatunayan ng mga Petron reinforcements na sina Hillary Hurley at Lindsay Stalzer na hindi lang hanggang papel ang taglay nilang husay nang pamunuan nila ang 25-13, 25-17, 25-19 panalo kontra sa Generika-Ayala kahapon sa opening ng Chooks to Go-Philippine Superliga (PSL) Grand Prix sa Filoil Flying V Centre sa San Juan.
Sinasabing pinakamahusay na tambalan ngayong season, pinamunuan nina Stalzer at Hurley ang atake ng Blaze Spikers sa second set at ang pagtapos nila sa third upang simulan ang kanilang kampanya sa pamamagitan ng panalo.
Tumapos na topscorer si Hurley sa itinala nitong 18-puntos habang nagdagdag naman ang dating Foton import at 2015 MVP na si Stalzer ng 14 puntos.
“Sobrang happy kasi lahat nag-deliver,” ayon kay Petron coach Shaq Delos Santos, na ibinaba ang sinasabing estado ng kanilang team bilang pinakamalaking banta sa tangkang ikatlong sunod na Grand Prix crown ng Tornadoes.
“Honestly, madami pa rin kaming inaayos, madami pa rin kaming kailangan i-improve. But the good thing is kung sino man ang ipasok namin – be it imports or local players – talagang nagde-deliver. So okay sila. I’m happy with our performance today.”
Naging kasing tigas ng bato ang ipinakitang performance nina Stalzer at Hurley sa attack zone para sa unang laban ng season-ending conference.
Pumatas pa ang Lifesavers sa iskor na 13 all sa second set, nang magpalitan sina Stalzer at Hurley sa paggiba ng kanilang depensa ng matitinding smashes sa wing at backline spots upang ilayo ang Blaze Spikers, 21-15.
Hindi na nakaporma ang Lifesavers buhat doon hanggang makuha ang set ng Blaze Spikers.
Nakatabla pa ulit ang Lifesavers sa 13-all sa third frame bago rumatsada ang Petron at nilayuan sila sa 22-16 bago nagsanib puwersa sina Hurley at Ria Meneses para tiyakin ang panalo. (FML)
- Latest
