Meralco tumabla

MANILA, Philippines — Ipinasok ni Ginebra coach Tim Cone sina veteran guards Mark Caguioa at Jayjay Helterbrand sa third period nang iposte ng Meralco ang 13-point lead ngunit bigo silang isalba ang  Gin Kings.

Nalampasan ng Bolts ang inspiradong pagba-ngon ng Gin Kings sa second half para itakas ang dramatikong 85-83 panalo sa Game Four ng 2017 PBA Governor’s Cup Finals kagabi sa Smart Araneta Coliseum.

Kumolekta si two-time PBA Best Import Allen Durham ng 28 points at 18 rebounds para itabla ang Meralco sa 2-2 sa kanilang best-of-seven championship series ng Ginebra.

Samantala, nakamit ni June Mar Fajardo ng San Miguel ang kanyang ikaapat na sunod na PBA Most Valuble Player trophy sa 2017 Leo Awards.

Si Fajardo ang ikatlong PBA player na sumikwat ng apat na MVP trophies matapos sina Ramon Fernandez (1982, 1984, 1986 at 1988) at Alvin Patrimonio (1991, 1993, 1994 at 1997) at ang kauna-unahang PBA player na hinirang na MVP sa apat na sunod na season.

Kasama ng 27-anyos na si Fajardo sa First Mythical Team ang kanyang mga San Miguel teammates na sina Chris Ross, Alex Cabagnot at Arwind Santos at Japeth Aguilar ng Barangay Ginebra.

Si Fajardo ay kasama rin sa All-Defensive team na binubuo nina Ross, Aguilar, Gabe Norwood ng Rain or Shine at Jio Jalalon ng Star.

Ang Second Mythical squad ay kinabibilangan nina LA Tenorio at Joe Devance ng Ginebra, Jayson Castro at Kelly Williams ng TNT Katropa at Cliff Hodge ng Meralco.

Si Ross ang hinirang na 2017 Most Improved Player of the Year award at ang Samboy Lim Sportsmanship award ay ibinigay kay Norwood.

Kinilala namang 2017 PBA Rookie of the Year si TNT Katropa big guard RR Pogoy, dating star player ng FEU Tamaraws sa UAAP.