Pinay spikers sasalang na

Laro Ngayon (Mitec Hall 8)

2 p.m. – Philippines vs Malaysia (W)

Kuala Lumpur – Uumpisahan na ng Phi-lippine national women’s volleyball team ang kampanya sa asam na titulo sa pakikipagtagpo sa host Malaysia ngayong alas-2 ng hapon sa women’s volleyball competition ng 29th Southeast Asian Games sa Malaysia International Trade and Exhibition Center (MITEC) Hall 8 dito.

Sa pangunguna ni team skipper Mika Reyes at star player Alyssa Valdez, hangad nila ang malakas na umpisa sa kampan-ya bago nila haharapin sa susunod na laban ang Vietnam na kanilang tinalo sa four sets sa nakaraang 19th AVC Asian Women’s Senior’s Championship sa Biñan, Laguna.

Susunod na makakaharap ng mga Pinay Spikers ang Indonesia  o Thailand sa knockout semifinals.

Malaki ang naitulong sa kanilang paghahanda ang AVC championship kung saan tumapos sila sa 8th place at nanalo sa Hong Kong at Vietnam kaya malaki rin ang tiwala ni coach Francis Vicente na magtatagumpay ang tropa sa Sea Games kung saan tumapos sa ikatlong puwesto noong 2005 sa Bacolod City.

“I like the progress of the team. The team had already developed. It is now fighting hard and pushing its opponents to the limit. I just hope we can carry that momentum into the SEA Games starting against Malaysia,” sabi ni Vicente.

Pinaalalahanan ni Vicente ang koponan na huwag mag-overconfident laban sa Malaysia dahil delikadong kalaban din ito.

“We still have to play with the same amount of toughness and intensity. We want to win convincingly to gain momentum and confidence against the likes of Vietnam and Indonesia or Thailand in the latter part of the tournament,” dagdag ni Vicente.

Bukod kay Reyes at Valdez, inaasahan din ni Vicente sina Jaja Santiago, Aby Maraño, Jovelyn Gonzaga, playmaker Kim Fajardo, Dawn Macandili, Gen Casugod, Maika Ortiz at  Ces Molina.