Irving pinakawalan na ng Cavaliers

CLEVELAND -- Natupad na ang kahi-lingan ni Kyrie Irving.

Pumayag ang Cavaliers na i-trade ang All-Star point guard sa Boston Celtics kapalit ng isang package na pinamumunuan ni All-Star point guard Isaiah Thomas.

Bukod kay Thomas, dinala rin ng Boston sa Cleveland para mahugot si Irving sina forward Jae Crowder, center Ante Zizic at ang Brooklyn Nets’ unprotected 2018 first-round draft pick.

“It’s extremely rare to trade for a 25-year-old player that’s done what he’s done, the offensive weapon that he is,” sabi ni Celtics president Danny Ainge. “We feel like his best basketball is still ahead of him.

Nauna nang hiniling ni Irving kay Cavaliers owner Dan Gilbert na dalhin siya sa ibang koponan dahil ayaw na niyang maka-tambal si LeBron James.

Sa pangunguna nina James at Irving ay naglaro ang Cleveland sa NBA Finals sa nakaraang tatlong seasons at nagkampeon noong 2016.

Tumapos naman ang Celtics squad bilang No. 1 sa Eastern Conference sa regular season ngunit sinibak ng Cavaliers, 4-1 sa Eastern Conference Finals.

Hindi nakapaglaro si Thomas sa huling tatlong laro ng serye dahil sa kanyang hip injury, subalit maaaring handa na para sa regular season opener.

Ang 25-anyos na si Irving ay nagtala ng mga average na career-high na 25.2 points at 5.8 assists sa nakaraang season.

“We have a player that’s proven to be a sure thing. We know how unpredictable the draft can be. You do pay a heavy price for a player of that age and that caliber,” wika ni Ainge.

May natitira pa siyang three-year, $60 million contract sa Cavaliers.

Nagposte naman si Thomas, ng average na 28.9 points sa nakaraang 2016-17 season at magiging free agent matapos ang 2017-18 campaign.