2019 Manila SEAG hosting ‘di tuloy

MANILA, Philippines - Sa isang press conference kamakailan ay ipinahiwatig ni Philippine Sports Commission Chairman William ‘Butch’ Ramirez ang posibleng pagbitaw ng bansa sa pamamahala sa Southeast Asian Games sa 2019.

Kahapon ay pormal na itong inihayag ni Ramirez.

Sinabi ni Ramirez na ang kasalukuyang kaguluhan sa Marawi City ang pangunahing dahilan ng pag-atras ng bansa sa pamamahala sa nasabing biennial event.

Ang pondo sana para sa 2019 SEA Games ay ilalaan ng pamahalaan para sa pagbangon ng Marawi City.

Ang formal letter ng PSC ay isinumite sa Philippine Olympic Committee.

“Due to the current situation in Mindanao, the problem of terrorism and atrocities, we regret to inform you (POC) that we will no longer push through with the hosting of the biennial meet,” wika ni Ramirez.

Noong 2015 ay pormal na inihayag ng POC ang pagiging host ng SEA Games sa 2019 para sana sa ikaapat na pagkakataon, ang huli ay noong 2005 kung saan hinirang ang bansa bilang overall champion.

Sa naturang edisyon ay humakot ang mga Filipino athletes ng kabuuang 113 gold medals para angkinin ang overall championship sa unang pagkakataon.