San Beda mamimili sa 3 imports

MANILA, Philippines - Inaasahang magdedesisyon ang San Beda kung sino kina Cameroonians Donald Tankoua at Arnaud Noah at Nigerian Toba Eugene ang dalawang imports na kanilang isasalang para sa darating na 93rd NCAA basketball tournament na nakatakdang magbukas sa Hulyo 8 sa MOA Arena sa Pasay City.

Ngunit tila nasabi na ni Red Lions team manager Jude Roque kahapon sa PSA Forum sa Golden Phoenix Hotel ang kanilang napili.

Sinabi ni Roque na nagbalik na sa ensayo ng San Beda si Tankoua matapos magkaroon ng torn ACL (Anterior Cruciate Ligament) sa second round ng nakaraang NCAA season at isasalang siya sa limitadong oras sa first round ng elimination.

“Donald (Tankoua) will play minimal minutes in the first round because he’s not yet 100 percent,” wika ni Roque, kasama sina San Beda players Franz Abuda at Jeremer Cabanag sa Forum.

Sa pagkakapasok ni Tankoua sa line-up ay pipili na lamang ang Red Lions sa pagitan nina Noah, ang NCAA Finals MVP noong 2016, at Eugene.

“The truth is, we will decide tonight (kagabi) the earliest because there are players who still have yet to submit their complete grades and it includes our imports,” sabi ni Roque.

Samantala, kumpiyansa si Roque na matagumpay na maidedepensa ng San Beda ang kanilang korona sa dara-ting na NCAA season.

Nagtala ang San Beda Red Lions ng 11-game title sweep sa nakaraang FilOil Premier Cup, kasama rito ang 75-72 pagtakas sa La Salle Archers, ang UAAP champions.