Sepfourteen buwenamano sa 2017 PRC-Triple Crown

CARMONA, Cavite, Philippines - Inangkin ng Sepfourteen ang unang leg crown ng 2017 Philippine Racing Commission-Triple Crown series mula sa isang dominanteng pagtakbo sa San Lazaro Leisure Park.

Sa paggiya ni jockey John Alvin Guce, nakahanap ang Sepfourteen ng pagkakataon para makakaripas sa huling 400-meters.

Inilampas ng 30-anyos na si Guce ang three-year-old colt laban sa Smokin Saturday at Biglang Buhos diretso sa finish line na tangay ang 20 metrong agwat sa mga kasunod na kabayo.

Nagsumite ang Sepfourteen ng bilis na isang minuto at 49.2 segundo sa pagkumpleto sa 1,600-meter course.

Inungusan naman ng Pangalusian Island at Golden Kingdom ang Smokin Saturday at Biglang Buhos para sa second at third place, ayon sa pagkakasunod, sa event na naglatag ng kabuuang premyong P3 milyon kung saan ang top prize na P1.8 milyon ay napunta sa Sepfourteen.

Nagposte ang Philracom ng kabuuang P6.5 milyon para sa tatlong karera na nakapaloob sa eight-race Manila Jockey Club extravaganza para sa pagdiriwang ng ika-150 taon nito.

“Tanaw ko nu’ng last 400 meters na malaki ang panalo, kaya tinuloy ko na,” sabi ni Guce.

Sa panalo ng Selfie sa Philracom’s 3YO  Locally Bred Stakes Race at ang pagbibida ng Brilliance sa Hopeful Stakes Race, kinumpleto ng Sepfourteen ang ratsada ng SC Stockfarm ni Oliver Velasquez sa first leg ng pinakaprestihiyosong racing series para sa three-year-old horses.

Ang three-leg series ay halaw sa Triple Crown ng United States kung saan ang three legs ay binubuo ng Kentucky Derby, Preakness Stakes at Belmont Stakes na may mas mahahabang distansya.

Inilunsad ang triple crown series noong 1978 at pinagharian ng Native Gift ang unang dalawang legs, habang ang Majority Rule ang dumiskaril sa tangka ng kabayong ‘sweep’ noong May 10 lamang na naging Triple Crown champions.

Ang mga ito ay ang Fair and Square (1981), Skywalker (1983), Time Master (1987), Magic Showtime (1988), Sun Dancer (1989), Strong Material (1996), Real Top (1998), Silver Story (2001), Hagdang Bato (2012) at Kid Molave (2014).

“Now that Sepfourteen has won the first leg, let’s see how he fares in the next two,” sabi ni Philracom Chairman Andrew A. Sanchez. “It’s been a while since a horse swept the Triple Crown and with Sepfourteen’s commanding win in the first leg, it has a great chance.”