Enforcers pinitas ang Quarterfinals ticket

MANILA, Philippines - Kumamada si point guard Jayson Castro ng game-high na 33 points.

Ngunit hindi ito sapat para maipanalo niya ang TNT Katropa.

Nanatili sa kanilang porma ang Mahindra Enforcers hanggang sa huling segundo ng fourth quarter para patumbahin ang Tropang Texters, 107-104, sa 2016 PBA Governor’s Cup kagabi sa Smart Araneta Coliseum.

Ang ikaanim na panalo ng Mahindra ang nagpasok sa kanila sa eight-team quarterfinals cast kasama ang TNT Katropa.

“Definitely it’s a new ground for us. We’re happy we made franchise history of reaching six wins,” sabi ni rookie coach Chris Gavina.

Humakot si import James White ng 24 points, tampok dito ang perpektong 10-of-10 shooting sa freethrow line, at 10 rebounds.

Nagdagdag naman ng 15 markers si Paolo Taha kasunod ang 12 ni LA Revilla at 11 ni Mike Digregorio.

“I told them before this game that it would take nothing less than a championship effort for us to win today,” wika ni Gavina.

Kinuha ng Enforcers ang 101-92 abante sa huling apat na minuto ng final canto hanggang makalapit ang Tropang Texters ang 96-101 sa huling 1:07 minuto mula sa dalawang free throws ni Castro.

Nagsalpak naman ng tatlong free throws si Revilla at dalawang charities si Taha sa nalalabing 18.2 segundo para ilayong muli ang Mahindra sa 106-98.

Nag-ambag si import Mychal Ammons ng 20 markers sa panig ng TNT Katropa kasunod ang 13 ni Larry Fonacier at 11 ni rookie Troy Rosario.

MAHINDRA 107 - White 24, Taha 15, Canaleta 13, Revilla 12, Digregorio 11, Guinto 9, Bagatsing 8, Agovida 4, Jaime 4, Ramos 4, Yee 3, Ballesteros 0, Elorde 0.

TNT Katropa 104 - Castro 33, Ammons 20, Fonacier 13, Rosario 11, De Ocampo 9, Rosales 5, Williams 4, Reyes 3, Tautuaa 3, Madanly 2, Carey 1, Rosser 0.

Quarterscores: 19-23; 51-44; 78-72; 107-104.