TNT Katropa lusot sa bolts

MANILA, Philippines - Sa ikalawang sunod na pagkakataon ay muling nalusutan ng Tropang Texters ang kanilang kalaban.

Natakasan ng TNT Katropa ang ginawang paghahamon ng Meralco sa fourth quarter para kunin ang 98-95 panalo at sumosyo sa liderato sa 2016 PBA Governors’ Cup kagabi sa Smart Araneta Coliseum.

“Two games in a row, medyo close, but it’s good that we’re able to hang in there and come up with a win,” sabi ni coach Jong Uichico. Hopefully, we can become consistent in the way we’re playing.”

Muling pinangunahan ni scoring guard Jayson Castro ang Tropang Texters, sinamahan ang nagdedepensang San Miguel Beermen at Mahindra Enforcers sa itaas ng team standings, sa kanyang 24 points, 7 boards at 5 assists.

Humugot si Castro ng 7 points sa fourth quarter para saluhin ang trabaho ni import Mario Little, tumapos na may 14 points at 11 boards sa loob ng 38 minuto.

Nagdagdag naman si Asian import Mike Madanly ng 14 points galing sa bench, habang umiskor si offseason recruit Kris Rosales ng 13 markers.

Hindi naglaro ang mga may injury na sina Troy Rosario, Kelly Williams at Matt Ganuelas-Rosser.

Samantala, bumangon ang Rain or Shine mula sa 11-point deficit sa third period para resbakan ang Phoenix, 106-89, at ilista ang una nilang panalo sa season-ending conference.