Tambalanan sa probinsiya dunay bag-ong ekipo
CEBU, Philippines - Ang kagamhanan sa probinsiya nakabenpisyo sa mga hospital equipment nga gihatag gikan sa grupo sa non-government organization (NGO).
Ang maong mga ekipo gilangkuban sa usa ka unit nga refurbished nga Stryker brand endoscopic unit ug usa ka unit nga refurbished Toshiba Famio 8 diagnostic ultrasound gikan sa Australian donors diin gamiton kini sa Bogo Provincial Hospital. Ang hunta probinsiyal mihatag og pagtugot kang Gobernador Hilario Davide, III sa paggama og Memorandum of Agreement tali sa Estudyante Otchenta, Inc. nga girepresentahan ni Alexius Jerome Yap sa maong donasyon.
Ang Estudyante Otchenta, Inc. usa kini ka registered organization kinsa gitahasan sa pagpasilidad sa donasyon sa nahisgutang mga serviceable hospital equipment. Nunot niini, lakip sa development agenda sa probinsiya ang pag-upgrade sa mga pasilidad ug ekipo sa mga provincial ug district hospital.
Tumong niini nga mahatagan og tukmang serbisyo sa panglawas ang mga residente sa kalungsuran.
Niining ulahi lang ang kagamhanan sa probinsiya nakig-partner sa usa ka laboratory marketing company nga maoy nag-provide og mga hospital equipment ug machines alang sa laboratory test. Usa sa mga ekipo mao ang alang sa blood analysis. Ang PhilHealth maoy mobayad sa nahisgutang kompaniya sa pagbutang nila og mga ekipo diha sa mga tambalanan sa probinsiya. - /DILT) (BANAT NEWS)
- Latest