Sayop nga mga mapa

Mangahas ko og sugyot sa Mines and Geosciences Bureau (MGB), nga ubos sa Department of Environment and Natural Resources (DENR), sa pag-angkon sa kasaypanan sa ilang geohazard maps aron makurehian sa labing dali nga panahon.

Mao ni ang labing maayo nilang mahimo human gibisto sa Provincial Disaster Risk Reduction and Management Office (PDRRMO) sa Sugbo ang makauuwaw nilang atraso:

Nawagtang sa gipasigarbo nilang mga mapa sa nag-ung-ong nga katalagman ang usa ka barangay sa Argao sa habagatang Sugbo ug usa ka sapa sa Moalboal sa kasadpang Sugbo.

* * *

Hinaot nga mohunong sa labing daling panahon ang lokal nga mga opisyal sa MGB sa pagsuway paglusot sa bulilyaso. Makapasamot og lubong sa dakong gahong sa ilang kaligdong ang pasalig nga giduaw sa 50 ka geologists ang tanang barangay ug nga nahimo ang mapa niadto pang 2014.

Makalusot lang ang MGB kun ilang mapamatud-an nga ang nawagtang nga barangay sa Argao ug suba sa Moalboal wa pa diha sa pagsusi sa ilang geologists niadtong 2012 ug nga nikalit lang og tumaw sa niaging tulo ka tuig pagkahuman sa mga mapa.

* * *

Hinaot nga human moangkon sa dakong kasaypanan, susihon dayon sa MGB nganong nahimo ang bulilyaso. Kinsa man ang nagbuot-buot lang paghimo sa mga mapa? Kinsa man ang nagdrowing-drowing lang sa papel samtang naghangad-hangad sa bungbong?

Hinaot nga human masusi unsay nahitabo sa mga mapa sa Argao ug Moalboal sublion sab ang mga mapa sa ubang kalungsoran ug mga dakbayan. Natsambahan ba lang ang duha ka lungsod o nahimo sab nga samang kasaypanan sa uban pa nga mga dapit?

* * *

Lisud na daan ang pagkumbinser sa lokal nga mga opisyal ug sa mga molupyo sa geohazard maps sa MGB. Mas lisud nga tuohan ang mga mapa nga nakalaktaw og labing menos usa gyud ka tibuok nga barangay ug labing menos usa gyud ka tibuok nga suba.

Susama ni sa Project NOAH sa Department of Science and Technology (DOST) nga human sa bagyong Yolanda nipasidaan sa mga barangay nga maigo sa storm surge. Nahilom hinuon ang NOAH dihang nireklamo ang mga molupyo nga sayop ang pasidaan kay ang ilang barangay nahimutang sa kabukiran nga layo ra sa dagat. ([email protected])