Nagtampo kay misis, mister nagbigti
MANILA, Philippines – “Paalam na sa inyo”.
Ito ang nakitang text message na hindi napadala ng isang mister sa kanyang misis bago ito nagbigti sa silid ng kanilang bahay kamakalawa ng umaga sa Quezon City.
Ang biktima ay nakilalang si Joel Nogot, 48, naninirahan sa Doña Vinancia Bldg., na matatagpuan sa no. 158 Kapiligan St., Brgy. Doña Imelda ng nasabing lungsod.
Ang bangkay ng biktima ay nadiskubre dakong alas-7:00 ng umaga ng misis na si Gloria na nakabigti sa steel window ng isang kuwarto gamit ang sinturon.
Nabatid na magkahiwalay na natulog ang biktima at misis nito matapos na umano ay magkaroon nang pagtatalo ukol sa pinansiyal.
Katabi ng biktima na natulog sa isang kuwarto ang dalawang anak na lalaki habang ang misis ay sa kabilang kuwarto katabi ang tatlong anak na babae.
Isinugod ang biktima sa ospital, subalit idineklara itong dead-on-arrival.
Nakita ng mga imbestigador sa draft na text message ng biktima ang pamamaalam nito na hindi naman niya naipadala.
- Latest