P1.3M gigahin sa Oplan Kalag-Kalag

CEBU, Philippines - Mogahin og pundo ang siyudad sa Sugbo alang sa pagkaon sa mga mobantay sa seguridad sa mga sam-ang subay sa paghandom sa adlaw sa mga kalag.

Sa session kagahapon sa konseho, gi-aprubahan ang resolusyon ni Konsehal Dave Tumulak nga nag-request og P1.3 milyones nga gahin alang sa pagkaon sa tanang tawo nga magbantay sa Oplan Kalag-kalag sama sa kapolisan, kabomberohan ug ubang force multipliers.

Nasuta nga moabot sa 2, 560 ka personnel ang i-deploy, 500 niini gikan sa PNP, 150 sa BFP ang uban gikan sa barangay ug Disaster Management Office.

Subay niini, nipahigayon og inspeksiyon sa mga sam-ang ang Cebu City Disaster Risk Reduction Management Office (CCDRRMO). Matud ni Nagiel Bañacia, pangulo sa CCDRRMO nga sa maong inspeksiyon usa sa ilang nakita mao ang pagpamul-ong o pag-trim sa mga kahoy sa mga sam-ang. Hinungdan nga kagahapon sa gabii nagsugod na ang Trimming Task Force diin ilang gi-una ang Calamba cemetery.

Ang maong Task Force gilangkuban sa Disaster Management Office, Department of Public Services ug Parks and Playground. Dili lang alang sa kalag-kalag ang maong task force kay nakita sa CCDRRMO nga ang mga kahoy sa siyudad nitubo na ug natabunan ang mga suga.

 Wala hinuoy angay kabalak-an ang maong pagpamutol sanglit adunay mo-uban nga tinugyanan sa Department of Environment and Natural Resources ang Trimming Task Force aron maoy mo-supervise sa pagpamutol sa kahoy.

 Karong Lunes, Oktubre 31 himoon ang final inspection sa mga sam-ang kuyog ang ubang task force. (BANAT NEWS)