Tubig-baha nga nagpundo, nanimaho gireklamo

CEBU, Philippines - Dili mominos sa 50 ka mga residente sa Janseen Site, Sitio San Roque sa Brgy. Basak San Nicolas ang nangreklamo kay dul-an na usa ka bulan silang nakasinati sa nagpundong tubig-uwan sa ilang lugar kay walay kaagian ug wala kini hubas-hubas.

Naabtan sa Banat News ang mga residente nga nagsul-ob og botas samtang naglakaw sa dapit nga naglunang sa tubig.

Matud ni Jing Zabate, usa sa mga residente sa lugar nga kanunay niyang lugiton ang drainage apan dili na gyud kini makatuhop og tubig tungod sa kabaga na sa lapok nga nagpundo.

Sumala pa ni Zabate, pipila na sab ka tawo ang nabulasot sa lugar ug gani pipila ka mga manimbahay nga muagi sa dapit ang dili na makahimo sa pag-agi gumikan sa nagpundo nga tubig-baha nga pwerteng baho-a. Gitug-an niini nga matag higayon nga aduna siyay pangagod sa iyang tiil tungod sa kanunay pagtunob sa tubig-baha, iya na lang butangan og asyete.

Malaumon si Zabate nga mahatagan og kasulbaran ang maong suliran ilabi na nga adunay mga bata nga nakasinati na og pag-ubo, hilanat ug sip-on.

Samtang ang laing residente nga si Marcelo Bangay, nitug-an nga nagkaproblema gyud sila karon kay wala man silay klarong kinatulgan tungod sa kabaho nga ilang masimhot. Nakasinati sab sila karon og sakit-sakit ingon man kagid-kagid.

Sama ni Zabate, nanghinaut si Bangay nga mahatagan sila og pagtagad kay basin og magdala unya og daghang sakit ang nagpundo nga tubig-baha ngadto kanila.

Gibutyag niini nga daghang pansayan sa ilang lugar ang wala na magamit kay nagpundo man ang tubig.

Suway nga gikuhaan og pamahayag si Kapitan Norman Navarro sa Basak San Nicolas apan dili kini makontak. (BANAT NEWS)