Toni, ibinahagi sa mga kanta ang love story nila ni Paul

MANILA, Philippines – Ibinahagi ng Ultimate Multimedia Star Toni Gonzaga-Soriano ang love story nila ng asawang si Paul Soriano sa pamamagitan ng mga awitin sa pinakabago niyang album na My Love Story ng Star Music.

“Music can move you in different ways. And when you’re in love, it echoes the emotional chord of your heart. Once in a while, you will bump into songs that speak so much of how you feel at that moment,” pahayag ni Toni sa album.

Kabilang sa My Love Story ang covers ng anim na awitin gaya ng When You Say Nothing at All, You & Me, Your Love, I Won’t Give Up, Falling Slowly, at ang unang single ng album na Baby, Now That I’ve Found You.

Espesyal din ang album dahil mayroon itong interludes bago ang bawat kanta kung saan isinasalaysay ni Toni ang kanyang mga pananaw sa pag-ibig, pati na ang mga karanasan niya kasama ang asawang si Paul Soriano bago pa man sila ikasal. Laman din ng album ang 2015 version ng tinatawag ni Toni na “love theme of my life,” ang hit song niyang Catch Me, I’m Falling na ang music video ay idinirek mismo ni Paul.

Ang My Love Story ay kasalukuyan nang napapakinggan sa Spotify at mabibili sa halangang P250 sa record bars nationwide. Maaari na ring madownload ang digital tracks sa pamamagitan ng online music stores katulad ng iTunes, Amazon.com, ABS-CBN Store, OneMusic.ph at Starmusic.ph.