Heart nagpasalamat kay Kris na makikipagtambal kay Chiz sa 2016

Nadulas, pero madaling binawi ni Heart Evangelista kung ano ang role niya sa first movie niya under Viva Films, co-produced by Multi Vision Pictures Entertainment, ang Trophy Wife.  “Ako si Gwen sister, no, ako ang twist ng story” at hindi na niya ikinuwento kung sino siya sa movie na tampok din sina Cristine Reyes, Derek Ramsay, at John  Estrada, sa direksyon ni Andoy Ranay.

Sa unang press release ng movie, napaka-daring daw ng roles ng bawat character na kahit si Heart ay may mga passionate kissing scenes.  Pero ngayong si Andoy Ranay na ang nagdirek, totally na itinapon na ang halos tapos nang nai-shoot nilang mga eksena.

 “Ang mga kissing scenes ko ngayon, very light na lamang, Cristine did everything,” sabi ni Heart.  “Magaling si Cristine, she has such confidence in doing her daring scenes.  Kapag sinabi ni Direk na ‘tanggal, tanggal siya talaga’. But hindi iyon ang kanyang personality, mahusay lamang siya talagang artista.”

Ayaw ba lamang niyang gawin iyon dahil kailangan pa niyang magpaalam sa boyfriend, si Senator Chiz Escudero?

 “No, I don’t need to ask Chiz.  I’m a liberated wo­man but there are certain things na may limitations din ako.   Hindi man niya ako binabawalan, hindi ibig sabihin noon ay gagawa na ako ng hindi tama.  Kaya iyong  love scenes, gusto ko sa amin na lang ng partner ko.”

Open daw naman kasi ang love life niya at inamin ni Heart na 2007 pa niya nakilala si Sen. Chiz at noon pa ay crush na niya ito. So ready na siya ngayong maging Senator’s wife or may lumalabas na balitang kakandidato ang boyfriend either president or vice president ng bansa?

“Hindi ko dapat i-prepare ang sarili ko doon. Magkaiba kami ng buhay. Ako bilang isang artista at siya bilang isang pulitiko. Sa balitang iyon na sila raw ni Kris (Aquino) ang magti-team sa 2016, ayaw kong pangunahan si Chiz. Maging first lady or second lady, wala pa naman siyang sinasabi sa akin. Nagpapasalamat na lamang ako kay Kris kung totoong kinunsider niyang ka-team si Chiz.”

Magpapakasal ba sila ni Chiz bago ang 2016 elections, at natawa si Heart kung kailan sila magkakaanak ng Senador.  May nagbanggit pa kung magkakaroon daw sila ng pre-nuptial agreement?

 “I’m a very organized person at wala pa naman kaming pinag-uusapang kasal, siyempre, kailangan muna niyang mag-propose.  If ever, I want to have a child three or four years pa. Wala kaming pinag-uusapan tungkol sa pera ni Chiz.”

Now, na tapos na ni Heart ang Trophy Wife na showing na sa July 30, ready na ba si Heart na magkaroon ng bagong soap?

“Ok lang kahit nakakapagod ang magkaroon ng soap, pero ayaw ko namang maging idle and unproductive.  I will choose the right project, but I have no particular leading man yet in mind.”