Pagpatitulo sa kabilin nga yuta

Sa dili pa ko mosugod sa pagtubag sa usa ka pangutana labot sa yuta, magpasalamat diay ko sa mga nagsunod sa atong column ilabi na niadtong uban nga mibisita gyud sa Banat News, apan kun duna moy pangutana mas maayo nga i-email lang o isuwat ninyo sa atong address nga gibutang sa ubos ning atong column aron mas sayon alang kaninyo ilabi na kay panagsa ra ko moanha sa atong opisina sa Banat News. Ang atong tukion karon mao ang pangutana kalabot sa pagpatitulo og yuta.

“Atty. Divine,

Maayong adlaw kanimo Attorney, naaghat ako sa pag-email aron kahatagan og katin-awan ug kun unsay angay namong buhaton kabahin sa among yuta. Aduna kami usa ka luna nga yuta nga gitikad sa akong mga ginikanan sud na sa hataas nga panahon, sukad pa sa bag-o nilang minyo. Pero dili ni mao ang tagsa tagsa nila nga bahin sa ilang ginikanan kay kining yutaa kabilin ni sa ilang kaliwat kaniadto nga namalhin og puyo didto sa laing lugar, unya gibilin lang ning yutaa sa akong apuhan bali ginikanan sa akong mama,unya pagkaminyo ni mama sa akong papa sila og kami ang nagtikad ug kami na ang nagbuhis anang yutaa sukad pa sa una. Ang edad sa akong mama karon 66 anyos na so dugaydugay na gyud. Ang akong pangutana posible ba nga among mapatituluhan ning yutaa? Unsa may process nga matituluhan ang yutaa ug mabutang sa among pangalan? Manghinaot ako sa imong sayo nga pagtubag. Salamat. — Sammy C.”

* * *

Sammy C,

Salamat sa imong pagpadangat sa maong pangutana. Kun kamo ang nagtikad sa maong yuta sud na sa pipila ka katuigan ug kamo ang nagbuhis sa maong yuta mamahimo mo nga mo-apply og Free Patent niini aron mabutang sa inyong pangan ang titulo sa maong yuta. Ang inyong buhaton mao ang pagsubmit og Free Patent Application ngadto sa Community Environment and Natural Resources Office kon CENRO nga diin nasakop ang inyong yuta. Aduna na silay mga porma ug mga dokumento nga inyong ifill-up ug ingon man mga rekisitos sama sa; 1) Duly accomplished application form. 2) Approved Plan and technical description of the land applied for. 3) Joint affidavit of two disinterested parties. 4) Proof of payment of real estate taxes. Ang CENRO mao nay mohimo og imbistigasyon niini sa dili pa nila aprobahan ang imong aplikasyon.

Hinaut natagbaw ka ug nahatagan ka og katin-awan sa imong pangutana. God Bless. — Atty. Divine

Ang Free Patent Application usa kini ka paagi pag-angkon sa alienable ug disposable nga yuta nga gikonsiderar nga public domain ug kini gamiton alang sa agricultural purposes basi sa Republic Act 782.. Ang kwalipikado nga okopante niini mao kadtong nagtikad sa maong yuta sa taas na kaayo nga higayon nga diin kini bukas, nagpadayon og ekslusibo niyang giangkon ang maong luna kon open, continuous and exclusive possession thereof. LEGAL CORNER, Atty. Divine Marcial-Flores, c/o Banat News, corner D. Jakosalem and V. Gullas Sts., Brgy. Sto. Niño, 6000 Cebu City or email sa [email protected]./ 09164532270