EDITORYAL-Jueteng, buhay na buhay at hindi pa nababasag

NOONG Pebrero, sinabi ni Philippine National Police (PNP) chief Director General Ronald dela Rosa na anim na buwan lang ang taning niya sa lahat nang illegal gambling at kasama rito ang jueteng. Magtatatlong buwan na ang nakararaan mula nang sabihin iyon ni Dela Rosa pero wala pang nakikitang pagbasag sa illegal gambling lalo na ang jueteng. Namamayagpag pang lalo ang jueteng ngayon.

May report na mga retiradong pulis umano ang nag-ooperate ng jueteng sa Metro Manila, Calabarzon at Central Luzon. Malakas umano ang loob ng mga retiradong opisyal sapagkat isang mataas na opisyal ng Philippine Charity Sweepstakes Office (PCSO) ang padrino nila. Ayon sa report, kumikita ang mga retiradong police officials sa jueteng ng P10 milyon araw-araw. May basbas umano ng PCSO official ang pag-operate ng jueteng kaya wala silang kaba.

Malaking hamon kay Dela Rosa ang ginagawa ng mga retired police officials. Dito masusubok ang tapang ng PNP chief kung kaya niyang basagin ang jueteng na inooperate ng mga dating pulis. Sinabi noon ni Dela Rosa na mahigpit niyang ipatutupad ang pagbuwag sa mga illegal na sugal ayon sa Executive Order No. 13 na inisyu ni Pres. Rodrigo Duterte. Sa ilalim ng kautusan, inaatasan ang PNP, NBI at iba pang law enforcement agencies na buwagin ang lahat nang illegal gambling. Makikipag-coordinate ang mga ito sa Department of Justice, Department of Interior and Local Govern­ment at Department of Information and Communications Technology.

Galit si Duterte sa illegal na pasugalan at isa ito sa binanggit niyang wawasakin nang umupo sa Malacañang noong Hunyo 2016. Sinabi nga niya na ipatitigil ang online gambling. Masama ito at hindi rin naman kumikita ang bansa kaya dapat nang mahinto ang sugal.

Dito makikita kung may kakayahan si Dela Rosa na maipatupad ang kautusan ni Duterte na maipatigil ang illegal gambling. Una niyang wasakin ang jueteng na inooperate ng mga retiradong pulis. Kung naging mabangis siya sa drug lords, dapat mas mabangis din siya sa jueteng lords at iba pang illegal na sugal sa bansa.