6 Tulak bulagta sa shootout, AWOL na parak tiklo
MANILA, Philippines – Bumulagta ang tatlong pinaghihinalang tulak ng illegal na droga matapos na manlaban sa mga operatiba ng pulisya sa magkakahiwalay na shootout sa lungsod ng Maynila at Caloocan kamakalawa ng gabi.
Sa ulat ni PO3 Marlon San Pedro ng MPD Homicide Section, bandang alas-11 ng gabi ng kumasa sa buy bust operation sa Tondo, Manila ang tatlong tulak na nasawi sa insidente.
Ang mga nasawing suspek ay kinilalang sina George Yap, 42, ng Batangas St., Kim Alyson Ocenar, 21, ng Ugbo St. at John Jezreel David, 21, ng Magsaysay St., pawang ng Tondo, Maynila.
Nakipag-deal ang poseur buyer ng mga operatiba na si PO1 Eduardo Lacson na bumili ng P500 halaga ng shabu sa mga suspek pero nakatunog ang mga ito sa operasyon na nauwi sa shootout na ikinamatay ng mga ito. Nakumpiska sa operasyon ang isang cal. 9 MM, dalawang cal. 38 at limang plastic sachet ng shabu.
Samantala, patay rin ang tatlo pang tulak habang arestado naman ang nag-AWOL na pulis sa Quezon City sa anti-drug bust operation sa Caloocan City kamakalawa bandang alas-8:30 ng gabi. Napaslang sa operasyon ang mga suspect na sina Reynaldo Matias, 55; Jessie Ludwig 35 at Jeffrey Cruz, 44 anyos.
Nasakote rin sa operasyon ang AWOL na pulis na si PO1 Erwin Vasquez na iniimbestigahan pa sa kasong kriminal kaugnay ng illegal drug trade na umano’y kinasasangkutan nito.
- Latest