Natividad nanghawod sa Rose pharmacy chess classic

CEBU, Philippines - Si Richard Natividad miposte og krusyal nga kadaugan batok ni Carlos Moreno sa  final round aron pagsakmit sa titulo sa Rose Pharmacy Chess Classic niadtong Domingo didto sa Robinsons Galleria Cebu.

Gitapos ni Natividad ang maong 7-round Swiss system competition bitbit ang labing taas nga 6.5 puntos aron pagbulsa sa P5,000 nga ganti.

Sila si Joey Ardiente ug Michael Joseph Pagaran nagtabla uban ang 6.0 puntos, apan si Ardiente maoy mipahiluna sa ikaduhang dapit  kortesiya sa mas taas niining tie-breaker. Si Ardiente midawat og P3,000, samtang si Pagaran nakaangkon og P1,000.

Nagsolo sa ikaupat si Venancio Loyola uban sa iyang 5.5 puntos, samtang sila si Jethro Esplanada, Diego Claro, Egay del la Peña, Carlos Moreno, Leo Cortes, Crisanto Tan ug KC Morala nga dunay 5.0 puntos matag usa maoy naglangkob sa top 11.

Nakadawat sab si Morala og espesyal nga premyo isip top lady player. Gisundan siya nilang Charita Barata nga dunay 4.0 puntos ug Spica Gonzales nga dunay 3.5 puntos.

Samtang ang top kiddie finishers mao sila si Joshua Villaran, Christian Fernandez, David Atup, Jerish Velarde ug TJ Tatoy sa managsamang 4.0 puntos.

Ubos sa superbisyon ni FIDE Arbiter Marvin Y. Ruelan, ang duha ka adlaw nga torneyo gipresentar sa Rose Pharmacy, Inc. pinaagi ni Cebuano chess patron Benjamin ‘Boojie’ Lim. (BANAT NEWS)